काठमाडौं खबर 
१० कार्तिक २०८१ काठमाडौं । नेकपा माओवादी केन्द्रले आज काठमाडौंमा खबरदारी सभा गर्ने भएको छ । बिहान ११ बजेदेखि सुरु हुने खबरदारी सभामा विभिन्न ठाउँबाट र्यालीसहित नेता कार्यकर्ताहरू भृकुटीमण्डप पुग्ने कार्यक्रम रहेको छ ।
केपी शर्मा ओली सरकारको सय दिन पूर्णतः असफल रहेको निष्कर्ष निकालेको माओवादीले काठमाडौँमा खबरदारी सभा गर्न लागेको पार्टीले बताएको छ । सो सभाको कमाण्ड अध्यक्ष प्रचण्डले गर्ने बताइएको छ ।
बिहान ११ बजे काठमाडौँ मलमा जम्मा भएर नेता तथा कार्यकर्ताहरू भृकुटीमण्डपतिर लाग्नेछन् । त्यहाँबाट बाजा, झाँकीसहित ब्यानरको नेतृत्व अध्यक्ष पुष्पकमल दाहाल ‘प्रचण्ड’सहित पदाधिकारीले गर्नेछन् । जुलुस भद्रकाली, सहिद गेट हुँदै काठमाडौँ मलमा जम्मा हुनेछ । सबै जम्मा भएपछि रत्नपार्क, बागबजार, प्रदर्शनी मार्ग हुँदै भृकुटीमण्डपमा आएर खबरदारी सभामा परिणत हुने अध्यक्ष सिंखडाले जानकारी दिए । उनका अनुसार अध्यक्षसहित पदाधिकारी, प्रदेशका अध्यक्षहरू ब्यानरमा रहनेछन् ।