![](https://hikeforhimalaya.com/kathmandu/wp-content/uploads/2023/11/favicon.png)
![](https://hikeforhimalaya.com/kathmandu/wp-content/uploads/2023/11/clock-icon.png)
काठमाडौं ः गत असार १५–१६ गतेसम्मनेपाल स्टक एक्सचेन्ज(नेप्से) परिसूचक घट्दो अवस्थामा थियो । आर्थिक वर्षको अन्तिमका केही दिन बैंक ब्याजको चपेटाले गर्दा पनि नेप्से परिसूचकमा केही कमी आउने नै थियो र लगानीकर्ताको मानसिकता पनि त्यसमै तयार थियो । असार १६ गतेसम्म पनि १४.८३ बिन्दुले घटेको नेप्से परिसूचकमा त्यसपछिका ११ कार्यदिनमा ९ दिन भारी वृद्धि भएको छ भने २ दिनमात्रै सामान्य करेक्सनको सामना गर्नुपरेको छ । असार १६ गते २०३७.०९ बिन्दुमा रहेको नेप्से परिसूचक असार ३० गतेसम्म पुग्दा २२० अंक बढेर २२५७.५९ बिन्दुमा पुगेको थियो भने आ.व.को अन्तिम कार्यदिन असार ३१ गते १७.१८ बिन्दुले घटेर नेप्से परिसूचक २२४०.४१ बिन्दुमा बन्द भएको छ ।
नेप्से परिसूचकको यो अस्वाभाविक वृद्धिको कारण चाहिँ काँग्रेस एमालेको गठबन्धन हो र त्यसमा पनि एमालेले अर्थ मन्त्रालय सम्हाल्ने निर्णय हुनु र एमालेका तर्फबाट विष्णु पौडेल नै अर्थमन्त्रीका रूपमा नियुक्त हुन्छन् भन्ने हो ।
एमालेले नै निर्णय गरिनसकेको अवस्थामा एमालेबाट विष्णु पौडेल नै अर्थमन्त्री बन्छन् र उनी अर्थमन्त्री हुनेबित्तिकै शेयर बजारमा वृद्धि हुन्छ भन्नु चाहिँ लगानीकर्ताको कमजोर मानसिकताको उपज हो र बजारका खेलाडीहरूको नयाँ लगानीकर्तालाई खेलपासोमा फसाउने षड्यन्त्र हो ।
संयोगले हो वा सुधारले हो, तर विष्णु पौडेल अर्थमन्त्री हुँदा शेयर बजारले उच्च बिन्दु बनाएकै हो तर कम्पनीहरूको वित्तीय परिसूचक। समग्र आर्थिक अवस्था र गम्भीर प्राविधिक विश्लेषणबाट अनुमान गर्नुपर्ने शेयर बजारको भविष्यलाई कुनै व्यक्ति अर्थमन्त्री हुँदैमा अब बुमबुम भन्दै सूचक बढाउने र बढी मूल्यमा शेयर बिक्री गर्नुचाहिँ ठुला तथा खेलाडी लगानीकर्ताहरूको नयाँ तथा साना लगानीकर्ताहरूलाई फसाउने षड्यन्त्र मात्रै हो ।
विष्णु पौडेलले शेयर बजार मैत्री नीति ल्यान सक्छन् र नीतिगत तथा संरचनागत सुधार पनि गर्न सक्छन् तर उनले त्यसो गरिसकेपछि बढेको बजार मात्रै स्वभाविक हुन्छ न कि नियुक्ति नै नभई हुने हल्लाका कारण ।
विष्णु पौडेल शेयरबजार मैत्री छन् तर उनी शेयर बजार वृद्धिका लागि कुनै ब्राण्ड होइनन् र शेयर बजारको वृद्धि कम्पनीको आर्थिक परिसूचकका आधारमा घट्ने र बढ्ने हुनुपर्छ नकि अर्थमन्त्रीको नियुक्तिले । यसबारेमा भने सचेत बन्न जरुरी छ ।