काठमाडौं खबर 
पुस २५, २०८० काठमाडौं । कामका लागि मात्र हैन बसोबासकै लागि नेपाल छाड्नेहरूको संख्या पनि ह्वात्तै बढेको छ । सन् २०२३ मा करिब ७१ हजार जना नेपाली स्थायी बसोबास गर्न विदेश गएको तथ्यांक सार्वजनिक भएको छ । विभिन्न मुलुक गएका नेपालीले उल्लेख गरेका विवरणका आधारमा अध्यागमनले विभागले यस्तो तथ्यांक सार्वजनिक गरेको हो।
सन् २०२३ मा १६ लाख तीन हजार आठ सय ३६ जना नेपाली विदेश गएका थिए। उनीहरूमध्ये ७० हजार नौ सय १५ जनाले स्थायी बसोबास गर्न आफ्नो मुलुक छाडेको खुलाएका छन्। त्यस्तै ९१ हजार तीन सय ४९ जनाले अस्थायी बसोबासका लागि विदेश गएको उल्लेख गरेका छन्।
विदेशमा रहेका आफ्नो परिवार भेट्न एक लाख ६७ हजार चार सय ८५ जना गएको तथ्यांकमा उल्लेख छ।’यो विदेश जाँदा खुलाएको कारणबाट निकालिएको तथ्यांक हो। यस आधारमा धेरै नेपाली स्थायी बसाइँसराइ गरेर र अस्थायी बसोबासका लागि विदेश जाने गरेको देखिएको छ,’ अध्यागमन विभागका महानिर्देशक रूद्रसिंह तामाङले सेतोपाटीसँग भने।
हालसम्म विदेशमा स्थायी बसाइँसराइ गरेको जनसंख्या कति छ भन्ने आधिकारिक तथ्यांक भने पाइँदैन। राष्ट्रिय जनगणना २०७८ ले २१ लाख ९० हजार पाँच सय ९२ जना नेपाली विदेशमा रहेको देखाएको छ। यसमध्ये १५ लाख ५५ हजार नौ सय ६१ परिवारका १७ लाख ९९ हजार नौ सय ७५ जना पुरूष र तीन लाख ९० हजार नौ सय १७ जना महिला छन्।
अध्यागमनले विभागको तथ्यांकले विदेश जानेमध्ये आधा नेपाली रोजगारीबाहेकको प्रयोजनमा जाने गरेको पाइएको छ। सन् २०२३ मा १६ लाख तीन हजार ८३६ नेपाली विदेश पुगेका छन्। उनीहरूमध्ये ८ लाख आठ हजार ४१५ जना रोजगारीका लागि खुलाएका छन्। उनीहरू श्रम स्वीकृति लिएर विदेश गएका हुन्।
त्यस्तै श्रम स्वीकृति नलिएर पनि रोजगारीका लागि भन्दै ६ हजार तीन सय ३४ जना विदेश गएका छन्। नेपालीहरू सबभन्दा धेरै गएको देश भने दुबई हो। वैदेशिक रोजगार विभागको तथ्यांक अनुसार पनि सबभन्दा बढी श्रम स्वीकृति लिएर दुबईकै लागि लिइन्छ। त्यस्तै दोस्रोमा भारत, तेस्रोमा कतार, चौथोमा मलेसिया र पाँचौंमा साउदी अरब गएका छन्।