काठमाडौं खबर 
मंसिर १८, २०८१ काठमाडौं । लोयल्टी एकेडेमी र हिमालयन शेर्पा क्लबबीच एन्फा यू–१६ फुटबल प्रतियोगितामार्फत युवा फुटबल टोलीलाई प्रवर्द्धन गर्नेबारे समझदारीपत्र (एमओयू) मा हस्ताक्षर भएको छ । सोमबार राजधानीमा आयोजित एक कार्यक्रमका बीच एकेडेमीका अध्यक्ष विजय सम्बाहाम्फे र क्लबका अध्यक्ष कर्मा छिरिङ शेर्पाले समझदारी पत्रमा हस्ताक्षर गरे ।
यस साझेदारीले युवा प्रतिभाको पहिचान र प्रोत्साहन गर्दै खेलकुदको उत्कृष्टता र खेलभावनालाई प्रवर्द्धन गर्ने दिशामा महत्वपूर्ण कदम चालेको जनाएको छ। प्रतियोगिताले १६ वर्ष मुनिकाका सहभागीलाई आफ्नो प्रतिभा प्रस्तुत गर्न, उच्च स्तरमा प्रतिस्पर्धा गर्न र व्यावसायिक वातावरणमा अनुभव हासिल गर्नको लागि एउटा सशक्त मञ्च उपलब्ध गराउने दुवै पक्षले विश्वास व्यक्त गरेका छन्।
यो समझदारीले लोयल्टी एकेडेमी र हिमालयन शेर्पा क्लबको साझा दृष्टिकोणलाई उजागर गर्दै युवाहरूलाई सशक्त बनाउन र फुटबललाई जरोबाटै विकास गर्न जोड दिएको एकेडेमी र क्लबका प्रतिनिधिहरूले बताए। प्रतियोगिताको योजना, आयोजन र संचालनमा विशेष ध्यान दिनुका साथै सहभागीलाई उचित निर्देशन, परामर्श र अनुभव प्रदान गरी उनीहरूको खेलस्तरलाई उचाइमा पुर्याउन सहयोग गर्ने विश्वास दुवै पक्षले लिएको छ।
कार्यक्रममा लोयल्टी एकेडेमीका अध्यक्ष विजय सम्बाहाम्फेले युवा खेलाडीको विकास र उत्कृष्टता हासिल गर्न अवसर प्रदान गर्ने यो अभियानमा हिमालयन शेर्पा क्लबसँग हातेमालो गर्न पाउँदा उत्साहित रहेको बताए । उनले यस पहलले खेलकुदमा प्रतिभा प्रोत्साहित गर्ने दुवै क्लबको लक्ष्य पूरा गर्न सहयोग गर्ने विश्वास व्यक्त गरे ।
समझदारीपछि हिमालयन शेर्पा क्लबका अध्यक्ष कर्मा छिरिङ शेर्पाले यो साझेदारीले युवा फुटबल प्रवर्द्धनप्रति आफूहरूको प्रतिबद्धता झल्काएको प्रतिक्रिया दिए । उनले भने ‘हामीसँगै यस्तो प्रतियोगिता आयोजना गर्ने लक्ष्य राख्छौं जसले युवा प्रतिभालाई उजागर गर्ने मात्र नभई अनुशासन, टीमवर्क र खेलमा इमान्दारीको भावनालाई प्रोत्साहित गर्नेछ।’
एन्फा यू–१६ फुटबल प्रतियोगिता २०२४ डिसेम्बर १५ देखि सञ्चालन हुनेछ। दर्ता र खेल तालिकासम्बन्धी थप विवरण आगामी हप्ताहरूमा घोषणा गरिनेछ ।