काठमाडौं खबर 
कार्तिक १, २०८१ काठमाडौं । संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले गौशाला धर्मशालासम्बन्धी विवादमाथि चासो दिएका छन् । माडवारी सेवा समाजले कौडीको भाउमा सञ्चालन गर्दै आएको सो धर्मशाला महानगरपालिकाको जिम्मामा दिएपछि एकातर्फ सेवा समाज अहिले आन्दोलनमा छ भने अर्कोतर्फ महानगरले सो क्षेत्र खाली गराएर गैरनाफामूलक हिसाबले सञ्चालन गर्न पहल गर्दै आएको छ । यसैबीच मन्त्री पाण्डेले कोषको बैठक आह्वान गरेका हुन् । साथै उनले धर्मशालासम्बन्धमा कुनै काम नगर्न कोषलाई निर्देशन पनि दिएका छन् ।
पशुपति क्षेत्र विकास कोषका अध्यक्षसमेत रहेका मन्त्री पाण्डेले असोज ३० गते ‘शान्ति सुरक्षामा समस्या उत्पन्न भएको’ भन्दै कोषलाई गरेको पत्राचारमा पशुपति गौशाला धर्मशाला खाली गराउने काम रोक्न निर्देशन दिएका छन् ।
कोषले आफ्नो पूर्ण स्वामित्वमा रहेको राज्यको सम्पत्ति धर्मशालालाई कुनै व्यक्ति वा व्यापारिक समूहलाई सञ्चालन गर्न नदिने बरु गैरनाफामूलक ढङ्गले काठमाडौँ महानगरपालिकासँगको सहकार्यमा सञ्चालन गर्ने घोषणा गरेपछि विवाद भएको हो । यसअघि धर्मशाला सञ्चालन गर्ने आएको मारवाडी सेवा समिति कोषको उक्त निर्णयको विरोधमा उत्रिएको छ ।
