काठमाडौं खबर 
अशोज १५, २०८१ काठमाडौँ । नेकपा एमालेले प्रधानमन्त्रीको अमेरिका भ्रमण सफल रहेको निष्कर्ष निकालेको छ । आज पार्टी अध्यक्ष केपी शर्मा ओलीकै नेतृत्वमा बसेको बैठकले यस्तो निष्कर्ष निकालेको हो । बैठकपछि पार्टी महासचिव शंकर पोखरेलले भने ‘सम्माननीय प्रधानमन्त्रीले अमेरिकामा रहँदा गर्नुभएका मित्रराष्ट्रका राष्ट्र तथा सरकार प्रमुखसँगका अनौपचारिक र औपचारिक भेटले देशको छविलाई अन्तर्राष्ट्रिय जगत्मा उजिल्याउन मद्दत पुगेको छ ।’
बैठकले प्रधानमन्त्री दैवी प्रकोप उद्धार कोषमा रु ५० लाख दाखिला गर्ने निर्णय गरेको तथा प्रतिनिधिसभा र प्रदेशसभा सदस्यबाट कोषमा योगदान गर्न अनुरोध गर्ने निर्णय गरेको जानकारी उहाँले दिनुभयो ।
बैठकले राहत र उद्धारका काम युद्धस्तरमा गर्ने निर्णय गर्नका साथै राजधानी काठमाडौँ जोड्ने सडक मर्मतसम्भारलाई पहिलो प्राथमिकतामा राखेर तदनुरुप गर्ने निर्णय गरेको महासचिव पोखरेलले बताउनुभयो । हालैको बाढीबाट बालीनालीमा भएको क्षतिको विवरण सङ्कलन गर्ने निर्णय पनि बैठकले गरेको छ ।