काठमाडौं खबर 
२४ भाद्र २०८१ काठमाडौं । भारतमा एमपक्सका बिरामी भेटिएको छ । एमपक्स संक्रमण रहेको देशबाट यात्रा गरेका यात्रुमध्ये एक पुरुष बिरामीलाई एमपक्सको लक्षण देखिएपछि उनलाई आइसोलेसनमा राखेर उपचार सुरु गरिएको छ । भारतीय स्वास्थ्य मन्त्रालयले आइतबार एमपक्स मामिलालाई अलग्गै राखेको जनाएको छ । विश्वको सबैभन्दा धेरै जनसङ्ख्या भएको देशमा मजबुत स्वास्थ्य उपायहरू रहेको स्वास्थ्य मन्त्रालयले एक विज्ञप्तिमा उल्लेख गरेको छ ।
भारतमा संक्रमित भेटिएसँगै नेपालमा पनि यसको जोखिम बढेको छ । भारतबाट नियमित नेपालमा आउजाउ चलिरहने र खुला सीमाका कारण भारतमा एमपक्सका बिरामी फैलिए भने नेपालमा नियन्त्रण गर्न कठिन हुने देखिन्छ ।
एक अर्ब ४० करोड जनसङ्ख्या भएको भारतमा हालसम्म एमपक्सको कुनै पनि पुष्टि भएको छैन । “हालै एमपक्सको मामिला फेला परेको देशबाट यात्रा गरेका एक युवा पुरुष बिरामीलाई एमपक्स केसको संदिग्ध केसका रूपमा पहिचान गरिएको छ । बिरामीलाई तोकिएको अस्पतालमा अलग्गै राखिएको र हाल स्थिर छ । एमपक्सको उपस्थिति पुष्टि गर्न नमूनाहरू परीक्षण भइरहेको छ”, स्वास्थ्य मन्त्रालयले विज्ञप्तिमा भनेको छ, “देश यस्तो पृथक यात्रासम्बन्धी मामिलाको सामना गर्न पूर्ण रूपमा तयार छ र कुनै पनि सम्भावित जोखिमलाई व्यवस्थापन र न्यूनीकरण गर्न बलियो उपायहरू छन् ।”
एमपक्सको पुनरुत्थान प्रजातान्त्रिक गणतन्त्र कङ्गोबाट भएको हो । विश्व स्वास्थ्य सङ्गठनले अगस्त १४ मा यसको उच्चतम अन्तर्राष्ट्रिय सतर्कता स्तर घोषणा गरेको थियो । एमपक्स मामिला एसिया र युरोपमा पनि पत्ता लागेको छ ।