काठमाडौं खबर 
भदौ १२, २०८१ काठमाडौं । काठमाडौंमा जारी साफ यू–२० च्याम्पियनसिपको फाइनल खेल आज हुँदैछ । दुई समूहका विजेता टोली नेपाल र बंगलादेशबीच उपाधिका लागि दिउँसो साढे २ बजे खेल हुन लागेको हो । खेल सातदोबाटोस्थित एन्फा मुख्यालयमा हुने एन्फाले जनाएको छ ।
भदौ २ गतेदेखि सुरु भएको प्रतियोगितामा नेपालसँगै दक्षिण एसियाका ६ टिम सहभागी थिए । समूह विजेताका लागि नेपालले भुटानलाई हराएको थियो भने बंगलादेशले भारतलाई हराउँदै फाइनल प्रवेश गरेका थिए ।
नेपाल र बंगलादेश दुवै पेनाल्टी सुटआउटबाट जित निकाल्दै फाइनल प्रवेश गरेका हुन् । त्यसैले पनि फाइनल खेल रोचक हुने अनुमान गरिएको छ ।