![](https://hikeforhimalaya.com/kathmandu/wp-content/uploads/2023/11/favicon.png)
![](https://hikeforhimalaya.com/kathmandu/wp-content/uploads/2023/11/clock-icon.png)
काठमाडौं । सरकारले ल्याएको सरकारी रोजगारी नीतिमा सुधारको माग गर्दै बंगलादेशमा दोहोरो झडप चलिरहेको छ । पाँच दिनसम्म चलिरहेको अशान्त अवस्था अहिले राजधानी ढाका र देशका अन्य स्थानमा पनि फैलिएको छ । विशेषत: सरकारवादी दलका विद्यार्थी संगठनबाहेक सबै पक्ष यसको विरोधमा उत्रिएको छ । बुधबारसम्म झडपमा परी ६ जना विद्यार्थीको मृत्यु भइसकेको बीबीसीले जनाएको छ।
सरकारले ल्याएको नयाँ नीतिमा ५६ प्रतिशतसम्म कोटामा सरकारी कर्मचारी भर्ती गर्ने बताइएको छ । यसको विद्यार्थीहरूले बिहीबारदेखि नै देशभरका व्यस्त चोकहरूमा प्रदर्शन गर्दै आएका छन् । यसैबीच ढाकास्थित नेपाली राजदूतावासले बङ्गलादेशमा रहेका नेपाली विद्यार्थीहरुलाई सुरक्षित रहन, अत्यावश्यक काममा बाहेक छात्रावास वा आफू बसेको स्थानबाट बाहिर ननिस्कन तथा आ–आफ्नो कलेज प्रशासनको निर्देशन पालना गर्न अनुरोध गरेको छ ।
बङ्गलादेशमा जारी ‘कोटा’विरोधी प्रदर्शनहरुमा भएका झडपका कारण बङ्गलादेश सरकारको शिक्षा मन्त्रालयले सम्पूर्ण सरकारी तथा निजी विश्वविद्यालय र शैक्षिक संस्थाहरु अर्को सूचना जारी नभएसम्मका लागि बन्द रहने भनी गरेको निर्णयको सन्दर्भमा उक्त दूतावासले त्यस्तो अनुरोध गरेको हो ।
कुनै कारणवश कलेज प्रशासनले छात्रावासबाट अन्य सुरक्षित स्थानमा जान निर्देशन दिएमा वा आफू बसेको स्थानमा सुरक्षा अवस्था प्रतिकूल भएमा दूतावासका द्वितीय सचिव योजना बम्जन र रिया क्षेत्रीलाई क्रमशः + 880180691013 र + 8801745407958 मा सम्पर्क गर्न दूतावासले आग्रह गरेको छ ।
दूतावासले आज सूचना जारी गर्दै बङ्गलादेशमा विकसित घटनाक्रमलाई नजिकबाट नियालिरहेको र सम्पूर्ण नेपाली विद्यार्थीको शान्ति, सुरक्षा सनिश्चित गर्न बङ्गलादेश सरकारका निकाय एवं सम्बन्धित कलेज प्रशासनसँग निरन्तर सम्पर्क एवं समन्वय गरिरहेको बताएको छ ।