काठमाडौं खबर 
पुस २, २०८० नयाँ दिल्ली । संसदमा हंगामा गरेको आरोपमा भारतको राज्यसभा र लोकसभाका गरी कुल ६७ विपक्षी सांसदलाई निलम्बन गरिएको छ। लोकसभामा भएको हंगामामाथि कारबाही गर्दै संसदले ३३ सांसदलाई निलम्बन गरेको छ भने राज्यसभामा अध्यक्षले ३४ विपक्षी सांसदलाई निलम्बन गरे । लोकसभामा विपक्षी सांसदहरूले प्लेकार्ड देखाएर विरोध गरेपछि यो कारबाही गरिएको भारतीय सञ्चारमाध्यमहरूले जनाएका छन् । कांग्रेस नेता अधीर रञ्जन चौधरी पनि निलम्बित सांसदमा परेका छन् ।
यसबाहेक कांग्रेसका जयराम रमेश पनि राज्यसभाबाट निलम्बित भएका छन् । संसदले हिउँदे अधिवेशनको बाँकी कार्य दिवसका लागि सबै सांसदलाई निलम्बन गरेको छ । लोकसभामा केन्द्रीय संसदीय मामिला मन्त्री प्रह्लाद जोशीले विपक्षी सदस्यहरूलाई निलम्बन गर्न माग गरेका थिए । त्यसपछि सभामुखले यी सदस्यहरूलाई निलम्बन गरिएको घोषणा गरेका थिए । गत शुक्रबार लोकसभामा १४ विपक्षी सांसदलाई निलम्बन गरिएको थियो । यसरी राज्यसभा र लोकसभासहित कुल ८१ विपक्षी सांसद निलम्बित भएका छन् ।
सांसदहरूलाई निलम्बन गरेपछि संसद्को बैठक मंगलबार बिहान ११ बजेसम्मका लागि स्थगित भएको छ । यो उल्लेखनीय छ कि सभामुख ओम बिरलाले सबै सदस्यहरूलाई सदनमा प्लेकार्ड नलगाउन आग्रह गरेका थिए। तर विपक्षी सांसदहरुले संसद्को सुरक्षामा लापरवाही गरेको भन्दै सिट अगाडि लगातार प्लेकार्ड देखाउँदै आएका थिए । यति मात्र होइन, लोकसभामा विपक्षी सांसद अब्दुल खालिक, विजय वसन्त र के जयकुमारको मुद्दा विशेषाधिकार समितिमा पठाइएको छ।
प्रतिपक्ष समस्यामा
सरकारको कारबाहीपछि प्रतिपक्ष समस्यामा परेको छ । अधीर रञ्जन चौधरीले सरकारको काम सदन चलाउने भएको आरोप लगाए । निलम्बन गरेर हाम्रो आवाज दबाइँदैछ । यसै क्रममा कांग्रेस नेता गौरव गोगोईले सरकारले आफ्नो आवाज दबाउन खोजेको बताएका छन् । उनले ससद्ले गृहमन्त्री अमित शाहलाई बचाउन चाहेको बताए । चौधरीले विगत दुई दिनदेखि निलम्बनमा परेका हाम्रा सांसदको निलम्बन अन्त्य गर्न माग गर्दै आएका थिए ।