काठमाडौं खबर 
मंसिर १७, २०८० भारतमा चार राज्यमा भएको विधानसभा चुनावको मतगणनाको नतिजा अत्तिम चरणमा पुग्दा केन्द्रमा सत्तासीन भारतीय जनता पार्टी (भाजपा)ले हिन्दीभाषी क्षेत्रका प्रमुख तीन राज्यहरुमा बहुमतसहितको जित हासिल गर्दैछ । जारी मतगणना अनुसार मध्यप्रदेश, राजस्थान र छत्तिसगढमा भाजपाले बहुमत प्राप्त गरेको छ । मध्यप्रदेशमा आफ्नो सरकारलाई जोगाएको मात्रै छैन त्यहाँ विशाल जित हात पारेको छ ।
त्यस्तै, राजस्थान र छत्तीसगढ राज्यमा पनि ठूलो जित हात पारेको छ । ती दुवै राज्यमा कांग्रेसको सरकार थियो । नोभेम्बरमा चरणबद्ध रुपमा मध्यप्रदेश, राज्यस्थान, छत्तिसगढ, तेलंगाना र मिजोरम राज्यमा चुनाव भएको छ ।मिजोरम बाहेकका चारवटा प्रदेशको मतगणना आइतबार एकैसाथ भएको हो । मतगणना भएका चारवटा राज्यमध्ये तीनवटामा भाजपा र दत्षिणी राज्य तेलंगानामा कांग्रेसले जित हासिल गर्दैछ । साढे ५ महिना पछि अर्को वर्ष २०२४ को मई महिनामा केन्द्रीय चुनाव हुँदैछ ।
त्यसअगाडि भएका राज्य तहका विधानसभाहरुको चुनावलाई केन्द्रीय चुनावको तस्बिरको रुपमा हेरिँदै आएको थियो । विपक्षी दल कांग्रेसले सरकार चलाईरहेको राजस्थान र छत्तीसगढमा पनि जित हासिल गरेको भाजपा यतिबेला उत्साहित देखिएको छ । सम्बत्धित प्रदेश र देशैभरका भाजपा पार्टी कार्यालयहरुमा कार्यकर्ताहरुले खुसी मनाएका छन् ।
कांग्रेस नेता राहुल गान्धीले गतवर्ष गरेको ‘भारत जोडो यात्रा’ वा उनका अन्य विभिन्न प्रयासहरुको जादू हिन्दी भाषी प्रदेशमा देखिएन । यसअघि दत्षिणी राज्य कर्नाटकमा जित हात पारेको कांग्रेसले पुनः त्यही क्षेत्रको तेलंगानामा भने सफलता पाएको छ । त्यहाँ क्षेत्रीय पार्टी बीआरएसको सरकार थियो । मिजोरमको मतगणना सोमबार हुने छ । त्यहाँ ‘हंग पार्लियामेन्ट’ हुनसक्ने अनुमान गरिएको छ । त्यहाँ अहिले नेसनल फ्रन्ट पार्टीको सरकार छ ।