काठमाडौं खबर 
कार्तिक २९, २०८१ काठमाडौं । झाँक्री प्रकाश भुजेलको गाडीले ठक्कर दिएर एक मोटरसाइकल चालकको ज्यान गएको छ । तीब्र गतिमा आएको उनको ल्याण्ड कुजर गाडीले आफ्नो गतिमा हिँडिरहेको मोटरसाइकलमा सवार दुई जनालाई ठक्कर दिएको थियो ।
गम्भीर अवस्थामा रहेका उनीहरूलाई तत्काल ग्रान्डी अस्पतालमा उपचारका लागि लगिएको थियो । उपचारका क्रममा कागेश्वरी मनोहरा २ आलापोट बस्ने ३८ वर्षीय नारायण नगरकोटीको मृत्यु भएको हो । उनकी श्रीमती ३२ वर्षीया सानुमाया नगरकोटी गम्भीर घाइते भएकी छन् । उनको अवस्था गम्भीर र भेन्टिलेटरमा राखेर उपचार भइरहेको पारिवारिक स्रोतले जानकारी दिएको छ ।
उता भुजेलले प्रहरी समक्ष आत्मसमर्पण गरेका छन् । घटनालगत्तै फरार भएका भुजेलले बुधबार साँझ प्रहरी समक्ष आत्मसमर्पण गरेको प्रहरीले जनाएको छ । अब उनलाई सवारी चालक अनुमति पत्र भएको र सवारी सीमित गतिमा चलाएको खण्डमा क्षतिपूर्तिसहित ३५ दिनको जेल सजाय हुने छ भने अनुमति पत्र नभएको वा तीब्र गतिमा सवारी चलाएको भेटिएमा त्यो भन्दा थप कारबाही हुनेछ ।